Pasado o Campo do Rolo (hoxe Praza de Galicia/CEIP Frei Luis de Granada) o Camiño de Santiago, despois dun treito de 330 metros, alcanza a Ponte de Sárria, agora coñecida como Ponte Ribeira, e que nalgún tempo foi chamada Ponte Vella. Esta ponte ten a súa orixe no século XII e foi alzada para o servizo dos peregrinos varias décadas antes de que o rei de Galicia e León, Afonso IX, dese carta de fundación da Vila Nova de Sárria (Pobra de Sárria / Vila de Sárria )
O camiño, tamén coñecido como “Camiño de Castela” e “Camiño de Triacastela ” recibía pola esquerda o Camiño do Courel, que pasaba por “Vilasante do Camiño” e antes de chegar ao río había muiños que chamaron a atención de Laffi que cantou a beleza da veiguiña . Un destes muiños, o Muiño da Ponte Ribeira (Muiño de Neira ou de Solance) foi doado polos Reis Católicos a un Meiriño por eles nomeado para señorear a Fortaleza sarriá.
A Ponte Ribeira era propiedade da vila , que gozaba do previlexio de cobrar pontaxe, nas catro pontes de pedra, a pasaxeiros e traxinantes que por elas pasaban. Os peregrinos estaban exentos de pagaren esa peaxe, e todos os anos, á conta dos ingresos, o concello facía reparos.
Hoxe a ponte presenta problemas que provocan graves perxuizos, tanto aos peregrinos como aos industriais, alumnos dos de ensino e público en xeral, e que anda na aira do baralleo entre o Concello, a Deputación, a Confederaración Hidrográfica Miño-Sil e Patrimonio, sen que se tomen determinacións para que a Ponte de Sárria, que vai cara os seus 900 anos, volte a ser lugar de paso seguro, de maneira que aqueles que queren chegar ao Burgo medieval (A Vila) poidan facelo polo secular camiño.
É de temer que, nin movendo Roma con Santiago, a vella Ponte de Sárria, que coñeceu a pegada do Padre Sarmiento nunha das súas viaxes a Galicia, e así a anotou no seu caderno, sexa lugar de paso no vindeiro Ano Santo.
