Queren liquidar, coa escusa da legalidade (da súa legalidade), o transporte escolar do colexio de Seoane. Un servizo de taxi que recolle ós cativos nas porta da casa, realizado por veciños que levan ducias de anos traballando e que no seu momento lle quitaron as castañas do lume á administración.
Un ataque frontal a un servizo de calidade e eficaz, un ataque frontal a seis familias traballadoras do courel para darlle os cartos a unha grande empresa que parece ser que ten moitos amigos. Cambian un servizo que funcionaba perfectamente ben usando furgos pequenas que se moven como Dios polas aldeas, e pensan poñer microbuses cambiando ademais as rutas por sitios imposibles.
“O tipo que fixo as novas rutas e os tempos delas debía ir ben fumado ou seguro que nunca saíu do despacho”
Serve como curiosidade que cun microbús de 15 prazas prentenden ir a Órreos (iso quería velo eu subindo) e despois baixar ata o cole pola pista de Campelo ata Moreda. Supoño que porán unha tirolina para baixar ó bus. Resumindo, que o tipo que fixo as novas rutas e os tempos delas debía ir ben fumado ou seguro que nunca saíu do despacho.
Propoño facerlle unha aposta ós señores da Xunta; se son capaces de subir o microbús a Órreos, rousar dentro da aldea e logo baixar ó cole por Moreda e despois volver polo mesmo sitio habería que invitar ás cabezas de unto pensantes a gintonic de por vida; iso si, se non son capaces de cumprir eses plans, que dimitan e se dediquen a outra cousa porque para isto non serven.
Pretenden acabar co traballo no Courel, prexudicar ós nenos, simplemente por favorecer ós seus colegas. Queren un rural morto, calado, sen xente para que logo poidan inzar os nosos montes de eucaliptos e eólicos dos seus amigos. Non se pode calar ante tal inxustiza, hai que mobilizarse. Se fai falla ir á Xunta, e durmir alí ó raso, haberá que ir. Tampouco lles importa o Courel que ata atacan ós seus propios votantes, pouco lles importa a xente comparado con encher de cartos ós amigos.
“Queren un rural morto, calado, sen xente para que logo poidan inzar os nosos montes de eucaliptos e eólicos dos seus amigos”
Din que os taxistas actuais tamén poden presentarse ó concurso pero o que non din é que teñen que presentarse a todo o lote completo e non só do Courel co que fan que ningunha empresa pequena ou mediana teña recursos para facelo. Dan noxo, moito noxo porque están xogando co pan e a vida da xente do Courel.
Tamén digo unha cousa, teñen 42 deputados, non sei que tipo de droga nos botan na auga que mexan por nós e damos as grazas.
Veña, non digo máis que me quento!
