EspertaMonforte! denuncia o mal estado do acceso ao Mirador do Duque

Segundo a formación política da oposición no Concello de Monforte, a estrada de acceso está nun estado de conservación pésimo dando mala imaxe de cara ao turismo.

Aspecto da estrada que comunica co Miradoiro do Duque. Fonte: EspertaMonforte!

O Miradoiro do Duque é o único miradoiro da Ribeira Sacra que pertence ao Concello de Monforte e resulta de gran interese turístico e relevancia para a economía da zona por estar nunha paraxe natural espectacular.

Sen embargo, segundo sinalan dende EspertaMonforte! “as condicións nas que se atopa a zona son deplorables” e comparado con outros miradoiros “como poden ser os que pertencen ó Concello de Sober, as diferenzas son abismais”, engaden.

Afirman tamén que a estrada totalmente desfeita por mor dos camións de gran tonelaxe que están a traballar na zona sacando madeira do monte e que o alcalde parece estar despreocupado aínda sabendo da gran afluencia que ten este punto turístico.

Abondando no anterior lembran que o problema do acceso ó miradoiro non é só para os turistas, senón para os veciños/as que viven na zona e transitan por esa estrada cada día.

No comunicado á prensa reprochan finalmente ao Alcalde, José Tomé, que sendo tan amigo de asfaltar, sobre todo no casco urbano, ben podía levar un pouco asfalto para arranxar a pista que leva ata o miradoiro ou ben lle comunique á administración competente cal é a situación para que tomen cartas no asunto.

DEIXAR UN COMENTARIO

Please enter your comment!
Please enter your name here