O reto dos socialistas da Pobra do Brollón estas pasadas eleccións municipais pasaba por derrotar ao BNG e alcanzar a alcaldía, ou como mínimo restar poder aos nacionalistas na corporación local. Pero ningún destes escenarios se deu tras o reconto electoral, ao contrario, o BNG sumou un concelleiro máis obtendo a maioría absoluta.

Chegados a este punto, o líder e candidato á alcaldía polo PSOE, Javier González, adiantou a diferentes medios e nas redes sociais que non tomará posesión da súa acta de concelleiro agradecendo así mesmo a todos/as votantes da súa lista a confianza amosada nestas eleccións. Na conta de Facebook exprésase dicindo que “renuncio por coherencia coas miñas ideas, sempre defendín que a política é algo circunstancial, agradezo tamén ao PSdeG-PSOE ter confiado na miña persoa para representalo como candidato foi unha gran honra”. No comunicado afirma marchar coa satisfacción de ter feito todo o que estivo nas súas mans, agradece o traballo do equipo e indica que “queda moi boa xente que seguirá tirando polo partido, eu seguirei como militante de base axundando en todo o posible”.

González expresou tamén a diferentes medios que recoñece os malos resultados e lembra que tiñan propostas interesantes para o concello, propostas como a creación dunha cooperativa municipal para xestionar a riqueza dos montes do concello. “A priori’ parecía unha iniciativa que tiña moi boa acollida, pero ao final os veciños e veciñas optaron por darlle confianza ao BNG para seguir gobernando, engade.

Outro dos argumentos, máis persoal, foi a opinión que ten no exercicio da política, ou polo menos nos intentos de chegar a postos de goberno no concello. Neste punto, o ata agora líder do PSOE da Pobra vén a dicir que segundo a súa opinión persoal “ningún candidato se debería presentar máis de dúas veces a unhas eleccións”.

Ao longo destes días decidirase sobre o relevo de González pero todo indica que ocuparán as dúas actas de concelleiros/as gañadas polos socialistas, María José Enríquez Rodríguez, e Javier Quiroga Castro, segunda e terceiro da lista respectivamente.