O alcalde de Monforte, José Tomé, tomou posesión do seu cargo na Sesión Constitutiva da Corporación Municipal, celebrada na mediodía do sábado 15 de xuño. Tamén xuraron o seu cargo os outros 16 concelleiros do municipio. Tomé foi elixido alcalde con 11 votos a favor, 4 en contra e 2 abstencións; nunha sesión que tivo unha grande afluencia de público.
No seu discurso, Tomé tivo, en primeiro lugar, palabras de agradecemento para a súa familia, polo apoio recibido durante a campaña e na súa lexislatura anterior como alcalde, para os seus compañeiros de partido e para os cidadáns, por ter confiado nel para ocupar ese posto durante catro anos máis.
Ademais, sinalou que a súa maioría foi a máis ampla rexistrada nunhas eleccións municipais en Monforte na democracia, feito que atribuíu á súa xestión durante os catro anos anteriores. Para esta lexislatura que comeza non destacou ningunha medida, pero sinalou que a súa corporación ten a intención de seguir mellorando a trama urbana da vila. Rematou a súa intervención prometéndolle aos monfortinos que pensa continuar a traballar polo seu benestar.
