En canto ás medidas sanitarias os socialistas chantadinos solicitan incrementar as labores de vixilancia por parte da Policía Local para previr actitudes incívicas que podan dar lugar a risco de contaxios. Coa reapertura de tendas e terrazas, distribuír kits de equipos de protección entre os establecementos que reabriron na Fase 1 da desescalada, formados por máscaras cirúrxicas, xel hidroalcólico, luvas e un protocolo de actuación con recomendacións hixiénicas. Nas tarefas de desinfección, piden manter as de rúas, espazos concorridos e equipamentos públicos realizadas ata o momento e realizar desinfeccións diarias dos espazos ocupados por terrazas de hostalería e restauración.

No que se refire ás medidas económicas, propoñen aprobar medidas fiscais de aprazamento do cobramento dos impostos municipais que tiveran que realizarse durante a vixencia do estado de alarma, como é o caso do Imposto de Vehículos de Tracción Mecánica. Cren necesario aprobar un plan de axuda contra a crise e de reactivación económica, cunha dotación orzamentaria suficiente dentro do proxecto de orzamentos para o exercicio 2020 que ainda non se presentou polo Goberno local.

Sobre as medidas organizativas no Concello, o Grupo Municipal Socialista cre preciso continuar coas convocatorias da Comisión de Actuación e Seguimento da Evolución do COVID-19 con frecuencia quincenal, para que siga sendo unha ferramenta de intercambio de información entre os distintos sectores e de aportación de novas propostas.

Os socialistas cren que é o momento de levantar a suspensión das sesións do Pleno, Xunta de Goberno Local, Comisións Informativas, xa que se dispón de todolos medios necesarios para realizar as reunións correspondentes seguindo as medidas preventivas que as autoridades sanitarias recomendan.