A petición chega a través dunha emenda formada polo PPdeG a unha iniciativa do PSOE que será obxecto de debate e votación este xoves na Comisión de Infraestruturas do Parlamento de Galicia.

O deputado popular explica que ata tres informes distintos emitidos pola Administración do Estado obstaculizan a execución deste novo viario. Pola súa banda a Xunta ten vontade de executar estas obras e incluso dispón de consignación orzamentaria vixente para facelas realidade: 750.000 euros para o ano en curso.

Esta conexión resulta fundamental para que o Porto Seco de Monforte  sirva como infraestrutura estratéxica capaz de atraer novas empresas e xerar novas oportunidades de emprego na comarca, un aspecto clave para contribuír á reactivación económica e no que Balseiro agarda exista coincidencia por parte de todas as forzas políticas.

A Xunta leva investido nesta plataforma máis de 20 millóns de euros. Un investimento que se corresponde cos traballos técnicos necesarios, a adquisición dos terreos, a súa urbanización e a construción do subtramo Porto Seco – LU-933.

Segundo Balseiro, “a tenor das cifras indicadas é manifesta a aposta do Goberno galego co desenvolvemento desta infraestrutura loxística, e que claramente contrasta co boicot do Goberno central, e coa pequena ou nula aportación do Concello e da Deputación provincial”. Con todo ao deputado popular non lle sorprende a parálise na que se atopa as infraestruturas dependentes do Goberno central no sur de Lugo.

“Da A-72, Monforte-Chantada, nada se sabe e a A-56 Lugo-Ourense avanza a paso de tartaruga. E a  construción da A-76 (Ponferrada-Monforte-Ourense) é outra das razóns esgrimidas polo Goberno central para torpedear a execución por parte da Xunta da conexión do Porto Seco coa N-120, pero a realidade é que a día de hoxe ningún tramo desta autovía está as obras licitadas”.