Nas últimas datas estanse levando a cabo traballos de asfaltado en varias vías municipais da “periferia” de Monforte, como O Fabeiro, As Gándaras ou O Casar. Estes camiños dan servizo a un elevado número de veciñ@s e, así e todo, carecen de beirarrúas transitables co perigo que isto supón. Por este motivo, e “en atención a que hai espazo suficiente para a mellora dos viais,” o BNG pedirá no pleno que se execute esta mellora da seguridade pública.

Por outra banda, Emilio Sánchez lembrará unha moción presentada hai varios meses polo BNG, a respecto do amaño do Mercado Gandeiro. Daquela, o portavoz do goberno contestou que se contemplaban amaños importantes para o futuro.

Hai pouco tempo arranxouse o teito de dúas das naves. O concelleiro nacionalista preguntará se esta era a gran reforma á que se refería o goberno, ou haberá que seguir esperando a un amaño integral desta infraestrutura.

En varias ocasións foi obxecto de debate no pleno municipal o “pésimo estado de conservación das rúas Manuel Murguía e da Xesta” (pista do canal), sen que, ata o de agora, nada se fixera ao respecto. O BNG pedirá no pleno que se realicen as xestión necesarias para que, dunha vez por todas, se amañen estas rúas.