Consideran desde EspertaMonforte! que o actual sistema de subvecións nominativas non ten en conta o número de deportistas que participan nas actividades organizada por un club, nin o nivel das competicións nas que participa, nin os éxitos acadados en cada tempada.

EspertaMonforte! entende que unha moción para modificar o modelo de subvención nominativa por outro de concorrencia competitiva sería votado en contra. O que propoñen é convocar unha liña extraordinaria de axudas e subvencións para aqueles clubs deportivos que participen como mínimo no Campionato de España, Europeo ou Mundial da modalidade deportiva que corresponda durante o período que abrangue cada convocatoria.

Esta iniciativa de EspertaMonforte! nace “ao ser conscientes do esforzo económico que a práctica deportiva supón para as familias dos mozos deportistas e dos clubs deportivos de base, sobre todo cando grazas ao seu esforzo e dedicación é posible participar en competicións deportivas fóra do ámbito da xeografía galega e en moitos casos da xeografía nacional”, sinalan.