A falta de investimentos en tecnoloxía no rural galego, tanto por parte das administracións públicas como polo sector privado, é unha realidade que se vai constatando ano tras ano “sen que se poida ver un mínimo sinal de que esta situación, esta absoluta falta de interese, vaia rematar”, matizan os nacionalistas.

“Moi ao contrario, hai apenas uns meses, unha compañía de telecomunicacións anunciaba que deixaría de prestar servizo pola rede de cobre ao concello de Folgoso do Courel, o que implicaría que, na práctica, o municipio quedaría sen apenas servizo de telefonía nin internet, xa que a rede de fibra óptica é anecdótica”, sinalan desde o BNG. Ao que engaden que hai escasas semanas, unha avaría deixou sen comunicación telefónica nin internet ao municipio.

Desde o Bloque Nacionalista Galego en Folgoso do Courel, consideran que non se pode seguir sendo indiferente “ante este muro tecnolóxico levantado tanto polas administracións públicas como polo sector privado, que separa ao rural galego en xeral, do resto do mundo”. Con estas condicións consideran que é imposible que se asente nova poboación no rural, e moito menos empresas que fagan atractivos estes territorios.