O Alcalde de Monforte, José Tomé Roca, deu a coñecer este mércores 1 de xuño varias actuacións que se van realizar na cidade. Trátase de obras de mellora en vías e camiños de titularidade municipal, así como reparacións e acondicionamento de infraestruturas tamén municipais. Segundo adiantou o rexedor, levaranse a cabo nos vindeiros días e que alcanzan preto dos 200.000 euros de investimento.
As actuacións comprenden, no que se refire vías e camiños, a renovación dun tramo da rúa Veiguiña, na que se construirán novas beirarrúas, da rúa Marcial de Valladares e da rúa Frai Martín Sarmiento; e do Camiño das Bestas, no que se renovará o seu firme.
O Concello tamén acometerá a reparación da Ponte de madeira do Malecón e o acondicionamento e peche dunha parcela propiedade municipal, ubicada na zona do Parque de Cobas. Esta ´última actuación forma parte da estratexia de ampliar dito parque e de retirar un establo en pésimas condicións –que era ata non hai moito de titularidade privada– e que se ubica na zona de ampliación deste importante espazo verde monfortino.
COMPROMISO E NOVOS PROXECTOS EN CARTEIRA
O Alcalde destacaba na presentación á prensa que “continuamos co desenvolvemento dun ambicioso programa de mellora de infraestruturas viarias da nosa cidade e das nosas parroquias, porque este é un compromiso que eu como Alcalde teño adquirido cos monfortinos e coas monfortinas dende o principio do meu mandato, e non olvidamos a ningunha parroquia, nin a ningún barrio de Monforte de Lemos”.
Concluíndo a súa intervención dixo que “en próximas datas, iremos dando a coñecer outros proxectos importantes para seguir mellorando a nosa cidade e tamén o conxunto do Concello”.
