InicioPolíticaFolgoso do Courel pedirá axuda ao Estado para os afectados polos incendios

Folgoso do Courel pedirá axuda ao Estado para os afectados polos incendios

A acción de goberno aprobada no Pleno deste venres 2 de setembro inclúe, entre outras demandas, reclamar que as axudas non se limiten aos inmobles cualificados como primeira vivenda, ter en conta construcións auxiliares e apoio económico á hostalería.

Publicado o

POR
Redacción
- Advertisement -

O equipo de Goberno do Concello de Folgoso do Courel aprobou no Pleno deste venres 2 de setembro unha moción para instar ao Estado a que amplíe as axudas para os afectados polos incendios a segundas vivendas.

Desde o Goberno local reclaman que as axudas non se limiten aos inmobles cualificados como primeira vivenda e que se teña en conta o papel que desempeñan moitas segundas residencias neste e noutros municipios rurais. “Hai moitas persoas que emigraron para volver e xubilarse aquí; veciños e veciñas que estaban a acondicionar as súas casas para o futuro e que se viron gravemente prexudicados”, explica a alcaldesa, Lola Castro.

Nesta liña de demandas, tamén se aprobou pedir axudas para construcións auxiliares danadas como alpendres, palleiras ou sequeiros; edificacións moi importantes no rural e que tamén necesitan ser reparadas.

No paquete de axudas a pedir, a rexedora Lola Castro inclúe tamén ao sector da hostalería. Entende que as dificultades nas que se atopan os locais de hostalería e as empresas turísticas fai necesaria unha atención especial e axudas extraordinarias para paliar a súa delicada situación.

OUTRAS DEMANDAS

O equipo de Goberno demanda ademais que o Estado lle comunique ao Concello de Folgoso do Courel a súa decisión sobre a aprobación das medidas de axudas aplicadas para as previsións orzamentarias municipais do próximo exercicio, e tamén que se habiliten exencións fiscais no caso de que as axudas tiveran repercusións tributarias para os beneficiarios de axudas.

Abondando nas demandas, consideran preciso iniciar o máis axiña posible os traballos para recuperar a superficie afectada e inciden na importancia de contar con mecanismos de cooperación e colaboración entre todas as administracións implicadas.

CARTA E AGASALLO Á VICEPRESIDENTA YOLANDA DÍAZ

A alcaldesa do Courel, Lola Castro, achegouse o xoves 1 de setembro ata a Fundación Uxío Novoneyra para saudar a Yolanda Díaz, Vicepresidenta do Goberno e Ministra de Traballo e Economía Social, aproveitando a súa visita ao Courel para presentar o seu proxecto político SUMAR.

A rexedora quería entregarlle unha carta con diferentes demandas do Concello de Folgoso do Courel para que tivese en conta como Vicepresidenta do Goberno –a maioría delas aprobadas no Pleno deste venres–, e un agasallo institucional no que se incluía unha caixa de produtos locais e dous libros sobre o Courel.

Agasallo para Yolanda Díaz / Concello Folgoso do Courel

O encontro non foi posible e tivo que deixarlle a carta e o agasallo ao persoal do equipo da Vicepresidenta, que se comprometeu a entregarllo.

ÚLTIMAS

Afra Blanco: “A Feira do Viño de Quiroga é a primeira festa que descubrín de Galicia”

Afra Blanco, que fora portavoz da sección xuvenil da UGT e hoxe responsable de...

Sinistro de circulación en Chantada

Segundo informou o 112, o persoal do Servizo de Urxencias Sanitarias de Galicia-061 foi...

A Deputación esixe á Xunta o remate urxente da estrada de Folgoso do Courel derrubada hai dous anos

A Deputación de Lugo esixe á Xunta de Galicia medidas urxentes para axilizar e...

O Club Quixós participa estes días na 2ª Copa de España de Eslálom Olímpico

O Club de Piragüismo Quixós, de Monforte, chegou con dez deportistas a terras catalás...