O concelleiro popular en Quiroga, José Luis Rivera, amósase sorprendido polo mutismo respecto da súa dimisión

José Luís Rivera Castro, concelleiro popular durante case 20 anos, amósase sorprendido pola falta de información pública do Concello de Quiroga respecto da súa dimisión, xa no mes de maio deste ano.

Rivera e Álvarez visita / JLR

A súa andaina como concelleiro comezou nas eleccións municipais do ano 2003 no que concorreu por primeira vez na candidatura do Partido Popular de Quiroga acadando unha acta como Concelleiro, ata a súa dimisión ocupou distintas responsabilidades no ámbito municipal chegando a ser Tenente de Alcalde.

Rivera é unha persoa coñecida na vila, traballou nun banco durante máis de 30 anos e forma parte da vida cultural de Quiroga como responsable da Agrupación de Gaitas dende 1992. Tamén participou activamente na organización das festas locais durante 40 anos e é un dos precursores da Feira do Viño creada en 1983.

O motivo da dimisión, segundo aclarou o xa ex-concelleiro, “foi por unha banda a falta de confianza no Alcalde e por outra a imposibilidade de convivir e sacar proxectos adiante para o municipio”, asegura.

Esta última dimisión únese a da Ex-Tenente de Alcalde producida o pasado ano. As dúas dimisións de membros do Goberno en 2 anos quedaron fora do foco público, e tardouse máis de 3 meses en dar conta ao Pleno da Corporación da dimisión.

A día de hoxe aínda non se cubriu o posto que deixou baleiro no mes de maio Rivera no Pleno Municipal. Preguntado polo futuro, Rivera apuntou que “este non é nin moito menos un punto e final na miña vida política, teño moito que aportar, Quiroga é o meu pobo e continuarei traballando para melloralo”.

DEIXAR UN COMENTARIO

Please enter your comment!
Please enter your name here