A rede de estradas da Deputación é fundamental para a vertebración económica e social da provincia, aseguran os populares, pero consideran que a “neglixente xestión do goberno presidido polo socialista José Tomé ten como consecuencia que gran parte destas vías estean en condicións lamentables, debido á falta de mantemento.”
As últimas choivas viñeron a agravar os problemas dos que o PP asegura ter alertado demandando a elaboración e aplicación dun plan de estradas. Agora os populares volven de novo “cunha oferta de consenso para estudar a situación real das estradas e decidir as medidas a adoptar canto antes, do contrario este inverno vai ser moi complexo para os veciños da provincia de Lugo”, sinala Castiñeira, que engade, “Á falta de liderado nunha área tan importante da Deputación únese a falta de incremento nos orzamentos para mantemento; coa suba de prezos, a capacidade de mantemento da rede viaria provincial queda seriamente mermada”.
Insisten en sentarse todos os grupos provinciais para analizar cal é a situación real da rede viaria e as medidas inmediatas que se poden tomar para mellorala.
