O deputado do BNG no Congreso, Néstor Rego, vén de rexistrar iniciativas en que reclama a mellora do firme da N-540 que conecta Lugo e Ourense, após o seu empeoramento por mor do temporal que recentemente padeceu a comunidade.
A estrada de titularidade estatal que representa a principal alternativa para ir de Lugo a Ourense, a N-540, leva décadas en mal estado e sen contar co adecuado mantemento. O temporal agravou a situación e engadiu novas fochancas que aumentan o risco de sufrir un accidente e pon en risco e vida das persoas usuarias da vía.
“A pesar das continuas denuncias e queixas por parte de colectivos, autoridades locais, das persoas usuarias e por parte do propio BNG, o Ministerio de Transporte segue sen levar a cabo algún tipo de actuación que poña fin ao mal estado do firme” denuncia o deputado do BNG. Para Rego, “a grave situación merece da intervención urxente do Goberno do Estado a través dunha reparación integral do firme estabelecendo un calendario urxente e comezar coas obras antes do posíbel”.
Ademais de demandar a actuación estrutural da N-540, a organización nacionalista destaca a necesidade de realizar unha actuación específica no termo municipal de Chantada. O responsábel local do BNG no Concello, Manuel Moure Montes, urxe a actuación nesta estrada até o polígono industrial de Chantada polo seu elevado número de fochancas. “De non actuar, estarase prexudicando gravemente á localidade de Chantada e a posibilidade de que novas iniciativas empresariais se asenten no concello e creen máis emprego” recrimina Moure
