Nun concorrido acto celebrado no restaurante Mar de Plata, os asistentes asignaron tamén os outros catro cargos con responsabilidade no Comité Executivo: Dolores Camino (vicepresidenta), Isabel Vergara (voceira), José Escudero (tesoureiro) e José Soto (secretario).

Tras ser proclamado candidato á Alcaldía, Claudio Garrido agradeceu “o apoio e a confianza” dos afiliados e simpatizantes e marcou para o 28 de maio “o obxectivo de ampliar o número de concelleiros para gobernar con maior estabilidade e autonomía”. O alcalde considera que “Camiña Sarria é claramente a opción gañadora e o principal rival a bater polas demais forzas políticas nas Eleccións Municipais”, polo que augurou “unha campaña de todos contra un.”

“Tras o traballo realizado nun mandato moi complicado por mor da pandemia e a crise derivada da guerra en Ucraína, Camiña Sarria é a única opción política cun futuro claro, cun liderazgo sólido e con forza e credibilidade para responder ás necesidades da veciñanza”, afirmou Garrido, quen sinalou como logros da xestión de goberno con Camiña Sarria, “a apertura da Ponte Ribeira, a recuperación do servizo 24 horas da Policía Local, a posta en marcha da piscina climatizada, o mantemento da rede viaria no rural, a renovación do alumeado con tecnoloxía LED e o aforro enerxético, a aprobación dos primeiros orzamentos municipais desde 2015 ou a aprobación da Relación de Postos de Traballo (RPT) do concello, entre outras actuacións.”