Carme Aira insistiu na obriga de Medio Rural de implantar medidas “contra un enlodamento que se produce de maneira habitual ao longo dos anos. Na última década, as diferentes obras nas vías e no corredor provocaron enlodamentos que afectaron a distintas traídas de augas e á vida do propio río.” Aira asegura ter confirmación da afectación do arrastre de cinsas cara o río, “causando asfixia e mortalidade de peixes e prantas acuáticas, debido ao seu carácter alcalino que modifica o PH da auga e prexudica á biodiversidade do seu hábitat.”

Por outra banda, engadiu que o río abastece a vila de Monforte de auga para consumo, “e o enlodamento incrementa o esforzo e o custe da potabilización das súas augas, a potabilizadora aínda logra auga de calidade a costa de horas de traballo e de avarías, pero outros concellos ou parroquias que non contan con eses medios deben pasar sen auga da traída por non lograr baixar a turbidez.”

En opinión da nacionalista, “as técnicas empregadas pola Consellería de Medio Rural para a restauración dos montes tralos sucesivos incendios teñen unha dubidosa intensidade e efectividade, sobre todo, cando a pendente é moi pronunciada.”

“É preocupante que ante situacións que se repiten ciclicamente, a reacción das consellerías de Medio ambiente e Medio rural,  xunto ao concello de Monforte, manteñan unha posición de de absoluta pasividade”, conclúe.