Rodríguez Pombo, axente facultativo medioambiental, é militante socialista dende os 18 anos e dende o 2011 é un habitual nas listas socialistas. Foi en 2015 cando, por primeira vez, presentouse como candidato á alcaldía; acadando catro concelleiros co 37,07% dos votos. Repetiu en 2019, cunha tendencia ascendente, conseguindo o 40,26% dos votos e chegando aos cinco concelleiros, a un da maioría absoluta.
A lista que encabezará Rodríguez Pombo está xa en elaboración “haberá algunha renovación, pero mantense a maioría dos integrantes que nos presentamos en 2019 e que continuamos cun proxecto claro e ilusión de poder acadar un futuro mellor para o Saviñao”, declara Celeste R. Pombo. Na lista estarán representadas as distintas realidades do concello, tanto a nivel xeográfico como coa presenza de persoas dos distintos sectores socioeconómicos maioritarios do Saviñao (funcionarios, empregados, autónomos, gandeiros…).
A última semana de marzo os afiliados votarán a lista completa coa que o PSdeG-PSOE se presentará ás eleccións. “A nosa prioridade é O Saviñao, presentámonos ás eleccións tendo claro que a política é unha función pública e que nós, como representantes dos e das veciñas, estamos aí para debernos ás súas reclamacións e tentar de solucionar os seus problemas, loitando por unha vida e futuro mellor”, explica Rodríguez Pombo. Para isto, a formación socialista vén de abrir un formulario electrónico onde os veciños e veciñas do Saviñao poden trasladar as súas aportacións e preocupacións para ser recollidas no programa electoral dos socialists.
