O secretario xeral do PSdeG na provincia, José Tomé Roca, puxo en valor “o compromiso que demostra Carmen Álvarez co seu concello e a loita constante por mellorar as condicións de vida dos seus veciños e veciñas, por manter os servizos públicos e por favorecer iniciativas que freen o despoboamento no Courel”. Un concello, subliñou, “que precisa un cambio radical ante o abandono evidente que está sufrindo por parte do PP, como quedou demostrado nos incendios forestais do pasado verán, e coa desidia e os atrasos da Xunta no arranxo do tramo derrubado e na mellora da principal estrada do Courel”.
A actual secretaria xeral e voceira do PSdeG no Courel, Carmen Álvarez, será novamente a candidata socialista á Alcaldía do municipio nas vindeiras eleccións do 28 de maio. Álvarez agradeceu o apoio de tódolos seus compañeiros, “e tamén da veciñanza do Courel, xa que me animou a seguir loitando e traballando pola miña comarca”.
A candidata á Alcaldía asegurou que os sucesivos gobernos do PP no Courel “están deixando un panorama desolador na comarca. Primeiro chegaron os incendios, non se fixo nada en prevención, pistas sen rozar e sen asfaltar. Despois chegaron os recortes nas rutas do autobús escolar e que, tras a presión popular, tiveron que ser paralizadas, e agora van saíndo á luz as carencias e o abandono das nosas estradas. Vivimos illados, o PP só se lembra da Montaña nas eleccións. Tíñalle que caer a cara de vergoña vir polo Courel a pedir o voto”, afirmou.
Álvarez lembrou o estado de conservación e mantemento en que se atopan as vías de comunicación da Montaña “polo Goberno do PP, como a LU-651, unha estrada que leva pendente, bloqueada e sen executar dende fai máis dunha década. Un día anuncian un desvío que non atravesa nin un carro de vacas e ao seguinte anuncian que desvían a ruta do transporte escolar porque ten que dar moita volta. Así estamos, vivimos no experimento constante e na deixadez máis absoluta”, incide.
Carmen Álvarez Álvarez (1959 – Ferreirós de Abaixo, O Caurel), funcionaria do INSS dende o ano 1981, actualmente é Coordinadora dos Centros de Atención e información da provincia (CAISS). É Concelleira en Folgoso do Courel dende o ano 2015.
