Este martes, 28 de marzo, o pleno provincial aprobou unha modificación orzamentaria para ampliar en 756 mil euros o orzamento para a construción do Centro de Atención a Maiores da Pobra do Brollón, no marco do convenio asinado entre o Concello e a Deputación de Lugo.

Os fondos para executar as obras pasaron así de 1,74 a 2,44 M€, acorde coa suba de prezos no sector da construción, despois de que o prazo de presentación de ofertas do último concurso rematara sen que se presentasen ofertas por considerar que o orzamento era insuficiente. 

No primeiro concurso a empresa adxudicataria acabou incumprindo o contrato porque considerou que tería perdas, entrando deste xeito nun período de varios meses de desacordo xudicial.

Dende o equipo de goberno da Pobra do Brollón, o alcalde Xosé Lois Maceda explica que “o incremento orzamentario era necesario xa que os prezos iniciais do proxecto, que se remonta a 2018, quedaron desfasados.” O rexedor celebra que a Deputación de Lugo adoptase a decisión, que el considera “un paso fundamental para que por fin se faga realidade esta obra tan necesaria para a veciñanza da Pobra do Brollón. Hoxe é un día de satisfacción para A Pobra do Brollón xa que se aceleran os prazos de execución da residencia, que se vai construír con total seguridade”. 

Plan Único 2023

O Pleno tamén deu luz verde á relación de actuacións e proxectos que os 67 concellos da provincia propuxeron para executar ao abeiro do Plan Único 2023, que nesta anualidade conta con 21,5M€ de fondos da institución provincial. As entidades locais danlle prioridade aos investimentos en obras e subministracións, aos que dedicarán 16M€, seguidos da creación de emprego, á que destinan 3,7M€,  e do Servizo de Axuda no Fogar (SAF), para o que reciben 3,4M€. Maite Ferreiro lembrou que “desde o inicio de mandato propuxemos resolver coa máxima axilidade todos os procedementos necesarios para poñer os recursos do Plan Único a disposición dos concellos e estamos satisfeitas de cumprir un ano máis con este compromiso”.