O candidato a revalidar a alcaldía, Claudio Garrido, resaltou que “a pesar das dificultades de gobernar en minoría e dos continuos obstáculos que tratou de poñer a oposición máis obstrucionista e destrutiva dos últimos mandatos”, entre os principais logros destes catro anos figuran os seguintes: “a apertura da Ponte Ribeira despois de oito anos pechada ao tráfico; a posta en funcionamento da piscina climatizada, que xa conta con máis de 1.000 usuarios; o reforzo da seguridade cidadá coa recuperación do servizo nocturno da Policía Local; a aprobación dos primeiros orzamentos municipais en cinco anos; as múltiples obras de acondicionamento da rede viaria do rural; o reparto das subvencións aos clubs e entidades deportivas; a creación da Concellaría do Camiño para corrixir o abandono e deterioro do Camiño; e a adquisición da Feculeira para a súa posterior conversión nun gran espazo cultural”.

Respecto ás expectativas electorais para o 28 de maio, Claudio Garrido sinala, “Afrontamos esta recta final da precampaña e a propia campaña con grande optimismo, polo que non queremos poñernos teito de votos e concelleiros. A veciñanza na rúa recoñécenos cada día o traballo realizado e trasládanos moi boas sensacións e o desexo de que Camiña Sarria alcance a maioría e poida gobernar en solitario para aportarlle estabilidade ao futuro de Sarria”.

Por último, Claudio Garrido espera que a constitución da coalición Contamos acabe coa actual situación na Deputación, “O único obxectivo é conseguir un deputado provincial que sexa chave e que defenda realmente os intereses de Sarria no organismo provincial. Por iso en Sarria precisamos unha maioría o máis ampla posible non só para gobernar en Sarria con independencia e estabilidade, senón tamén para facer posibles os obxectivos de Contamos na deputación”, argumentou Garrido.