Os socialistas aseguran que estas construcións tradicionais cuxa finalidade é a conservación do viño están nun entorno “completamente abandonado, os camiños completamente embarrados sen poder transitar por eles, nin andando nin en coche, dando unha imaxe penosa e de abandono moi lamentable do noso concello”.

O candidato socialista á alcaldía, Adolfo Rubio Pascual, sinala que “non entende o estado de abandono por parte do Concello no mantemento e roza destas zonas turísticas tan concorridas, nas que ademais se promoven visitas guiadas”.

Denuncian que o Concello impulse o turismo e non o acompañe doutras medidas de mantemento e conservación do seu entorno natural. “Cremos que para potenciar o turismo hai que coidar primeiro o gran patrimonio do noso municipio. A nosa candidatura promoverá un turismo sostible, capaz de dinamizar a nosa economía e poñer en valor o noso rico patrimonio cultural. Executaremos un plan de mantemento e conservación das rutas turísticas da nosa vila, xunto co adecentamento das pistas a través das diferentes axudas para investimentos”.