A popular Katy Varela explica que formalizaron a solicitude de acceso ao expediente do proxecto da praia fluvial o pasado 15 de maio “porque o alcalde de Monforte, xusto ao inicio da campaña das eleccións municipais, anunciou o proxecto de creación dunha praia fluvial, por case cinco millóns de euros”.  A día de hoxe aínda non recibiron resposta, co cal entenden que a solicitude foi aceptada e piden data e hora para acceder ao devandito expediente. En palabras de Varela, “segundo a lexislación vixente, os membros da corporación municipal teñen dereito a obter datos e informacións relevantes para desenvolver a súa función e, en caso de denegar esta petición, debe facerse no prazo de cinco días e mediante resolución motivada; en caso contrario, enténdese concedido por silencio administrativo”.

Os populares lembran ademais que “o 10 de maio, o alcalde de Monforte convocou aos medios de comunicación para informar da aprobación pola xunta de goberno do inicio do expediente de tramitación dunha dotación pública para unha área recreativa e unha praia fluvial na cidade; na rolda de prensa, o alcalde amosou unha carpeta de expediente da praia fluvial e a memoria do proxecto, ademais de explicar o que se pretendía facer e o custe da obra”.