A agrupación do PSdeG en Bóveda denuncia o mal estado que presenta a rede de saneamento municipal, sobre todo nos núcleos rurais. A voceira municipal socialista, Carmen Macía, úrxelle ao alcalde a que actúe e dea solucións: “ten que apostar por renovar este servizo básico que leva moitos anos en mal estado e é moi vello, pero non fai nada por arranxar este problema.”

“Os veciños e veciñas están continuamente sufrindo problemas de desbordamentos da rede. A situación xa pasa de preocupante en Eimer, na parroquia de San Fiz de Rubián, onde sofren desbordamentos e a saturación das tubaxes de maneira continua. O mesmo ocorre en San Cristovo de Guntín, que as augas fecais discorren, incluso, ao aire libre”, asegura Macía.

A voceira socialista segue denunciando a falta de recollida de lixo no municipio, “Nas parroquias os contedores están moi cheos, polo que urxe que se axilice o servizo para evitar os problemas e os prexuízos que esta situación lle provoca á veciñanza da localidade. Os contedores que menos se recollen son os amarelos, que presentan bolsas do lixo amontoadas no chan porque xa superaron a súa capacidade.”

Contedores Bóveda / PSOE de Bóveda