Din os socialistas que “nunca a atención sanitaria foi tan débil e nunca tivemos unha situación tan mala como a de agora. Antes aínda alternaban o médico substituto dalgún dos dous centros de saúde para atender a todo o municipio, pero agora nin iso: nin cobren os días libres dos médicos, nin vacacións, nin as baixas”, polo que a xente ten que desprazarse a Rubián. 

“Agora mesmo hai un médico substituto no Centro de Saúde de Rubián, pero no de Bóveda non temos ningún”, e critican ao rexedor local por permitir esta situación, “unha vez máis, deixa ver como non lle importa o benestar da súa veciñanza e prégase aos intereses da Xunta de Galicia, sen dicir nada nin esixir o que nos pertence aos bovedenses”.

A voceira socialista insiste na gravidade da situación ao ter unha poboación cada máis envellecida que precisa máis atencións e coidados, “e a Xunta que nos dá? Menos médicos, centros de saúde sen persoal sanitario e mándanos facer quilómetros para recibir atención, cando moitas persoas carecen de carné de conducir e de medios para se desprazarse. É hipócrita que a Xunta fale de fixar poboación no rural cando non dá servizos públicos de calidade”. O BNG tamén denunciaba recentemente esta situación.