A VI Asemblea de Interior Galego Vivo, que se celebrará o sábado 18 de novembro no ‘Casino’ de Chantada, suporá un pulo organizativo moi importante para a organización pois decidirase a política de alianzas e a estratexia a seguir perante os vindeiros comicios galegos e europeos.
“A organización da revolta das comunidades rurais debe continuar pulando por acordos amplos que doten de voz o mundo rural. Polo noso futuro e os bens comúns, polas nosas parroquias, pola vida con dignidade no medio rural e nas vilas e cidades interiores”, comentan dende IGV.
A xuntanza servirá tamén para afondar nos retos comúns, retos que se verán reforzados con novas agrupacións locais e co respaldo dos bos resultados acadados nas eleccións municipais do pasado 28 de maio.
Para Interior Galego Vivo este é un momento moi importante. Entenden que “chegou o momento de avanzar programática e organizativamente” e que esta VI Asemblea “servirá para decidir se trascendemos o eido municipal para contribuír a conformar acordos amplos que nos permitan que os nosos territorios e problemáticas teñan voz en Compostela e en Bruxelas”.
INTERIOR GALEGO VIVO
Esta formación política e social recoñece, entre outros, os seguintes obxectivos: facer fronte ao despoboamento das nosas parroquias; confrontar os desequilibrios territoriais, a degradación e a supresión de servizos que deterioran as condicións de vida da xente e que negan oportunidades á mocidade; e defender alternativas e un novo modelo de desenvolvemento máis equilibrado e xusto.
