Despois de semanas nas se contaba únicamente con dous médicos no centro de saúde de Chantada, desde Por Chantada engaden que esta fin de semana as persoas sanitarias ficaron sen servizo de taxi, “isto significa que deberán tirar de ambulancia para calquera saída desde o PAC tamén para as atencións domiciliarias que se fan os sábados á mañá e en caso de emerxencia atrasaríanse os tempos de resposta ao ocupar a ambulancia para saídas onde non sería necesaria”.

A formación política considera que esta situación se dá porque a xerencia négase a negociar cos taxistas, “cada semana que pasa queda máis claro que a folla de rota do PP procura á mantenta que a sanidade funcione mal porque senón é malo de entender semellante cúmulo de despropósitos”.

Por Chantada IGV entende que desde a Xunta e o PP deben asumir responsabilidades e cesar ás persoas “que son incapaces de xestionar algo tan importante e básico como a sanidade pública”.