O BNG denunciaba ante a Xunta Electoral de Zona que o PP tiña colgado unha pancarta electoral antes da celebración do Oso de Salcedo nun espazo non autorizado. Agora a Xunta Electoral pronúnciase e os nacionalistas aseguran que tiñan razón, “pendurar esa pancarta foi unha acción ilegal, e non o di o BNG, dio a lei, á que tamén debe someterse o PP”.

Desde o BNG comarcal lembran que antes de comezar a campaña estableceron un contacto coa Asociación de Salcedo para pedir permiso para gravar imaxes do Oso, “xa que este entroido é Ben de Interese Cultural de Galiza, e fai parte do patrimonio inmaterial que acompaña a candidatura da Ribeira Sacra a Patrimonio da Humanidade. Unha tradición e un símbolo de valor e propiedade universal digno de facer parte dun vídeo que queira visibilizar e poñer en valor a cultura galega”.

Aseguran que pediron permiso por respecto á veciñanza, e que rapidamente obtiveron resposta negativa, “por non querían meter a política no Entroido”. Rosana Prieto Florines responsable comarcal do BNG no Sur de Lugo, agradece a rápida resposta da asoción e condena “as accións e formas do portavoz popular na Pobra do Brollón amosando unha tremenda falta de respecto pola veciñanza, polas institucións e incluso polo cargo que ocupa que é de carácter representativo. É unha mágoa, porque o único que conseguiu foi enfadar e enfrontar a veciños, poñendo no centro do entroido os seus intereses persoais e de partido en prexuízo da tradición, do Oso, e do interese colectivo”.