A proposta, aprobada cos votos do goberno provincial, sinala as prioridades da provincia: axilizar a electrificación das conexións Lugo-Ourense e Lugo-A Coruña, remodelar a liña do antigo FEVE (Ferrol-Ribadeo) e iniciar os estudos da variante Curtis-Ordes para unir Lugo con Compostela, e insta á Xunta de Galiza a reclamar as competencias ferroviarias, recoñecidas no Estatuto, para crear un ente público de xestión ferroviaria.
“A cidade e a provincia de Lugo teñen que deixar de estar marxinadas en materia de infraestruturas ferroviarias. É preciso poñer a Lugo no mapa e comunicar á nosa veciñanza”, reclamou a deputada, Iria Castro, que lembrou a última perda de servizos que afronta a provincia, coa suspensión da conexión diurna entre Monforte e Lugo.
A deputada provincial reprobou a posicion do Partido Popular que se opuxo á proposta e “bota balóns fóra, eludindo reclamar a xestión das competencias ferroviarias”.
A Deputación tamén aprobou por unanimidade unha moción dos socialistas para instar á Xunta de Galicia a executar a obra do desdobramento da totalidade do trazado do corredor Nadela-Sarria-Monforte. O vicepresidente da Deputación e deputado provincial, Efrén Castro, reclamou ao goberno galego que concrete “uns prazos razoables para a execución das obras no corredor”, que conta cun total de 54 quilómetros.
