Os concelleiros do Grupo Municipal do PP de Monforte realizaron un balance do primeiro ano de José Tomé a fronte do concello monfortino tralas eleccións municipais de 2023, 12 meses “perdidos” nos que o rexedor “foi incapaz de atopar solucións aos problemas do abastecemento de auga potable e do saneamento”.

“Durante estes 12 meses puidemos ver como practicamente cada semana en Monforte houbo problemas e cortes no abastecemento de auga potable e na zona rural tamén son numerosas as parroquias que carecen deste servizo fundamental”, denunciou.

Katy Varela afirmou que dado que José Tomé e o seu equipo de goberno non conseguiron desatascar ningún dos problemas de Monforte nin facer que o municipio medrase “podemos cualificalos como un alcalde e un goberno ausentes”.

Lembran os populares que durante este primeiro ano de mandato defenderon 20 iniciativas e cualificaron o seu traballo como “un ano de oposición construtiva, humilde, cercana á cidadanía e ilusionante”, acción na que dividiron as súas propostas en sete bloques de traballo:

• Un concello comunicativo e transparente para toda a cidadanía. Con iniciativas centradas na mellora da comunicación e da transparencia do Concello “xa que o equipo de goberno unicamente promociona a imaxe do alcalde e oculta a información que vai en contra da acción de goberno, como as sentenzas xudiciais contra o concello”.

• Benestar social, igualdade e inclusión para todas as idades e colectivos, con mocións para que o Goberno central cumprise coa Lei de Dependencia ou alegacións ao regulamento da escola infantil municipal

• Medio ambiente, sostibilidade e limpeza en continuo coidado, con iniciativas para que o Concello de Monforte cumprise coa Lei de Benestar Animal ou para acadar bonificacións fiscais para entidades que traballan en favor da sociedade, como a inclusión na ordenanza da auga de Residencias e centros da 3ª idade e discapacidade como usos especiais do consumo.

• Economía, comercio local, empresas e rural apoiados e potenciados. Mocións para acadar bonificacións no IVTM ou no IBI, ademais de apoiar a permanencia da sede central do Craega en Monforte.

• Turismo, cultura e educación promocionados e dixitalizados, con iniciativas para a mellora da xestión do turismo ou para a modernización da Casa da Cultura.

• Urbanismo, mobilidade e redes modernizadas en todos os lugares, con accións para mellorar a seguridade viaria e para mellorar a imaxe do municipio, actuando nos edificios en ruina, por exemplo.

• Zonas deportivas e de descanso ampliadas e renovadas, defendendo entre outras iniciativas, unha zona de baño en Ribasaltas.

Os concelleiros populares recordan que levan agardando dende o 13 de maio a que o alcalde facilite os expedientes solicitados sobre a situación económica do Concello e sobre o ciclo da auga. Katy Varela recorda que o Concello ten a obriga legal de facilitar a documentación no prazo de cinco días “e xa pasaron case dous meses”. Os concelleiros do PP de Monforte preguntan a José Tomé “que ten que agochar para negar o acceso á información que se solicita do propio Concello”.