O concelleiro do BNG, Manuel Luaces, na súa intervención no pleno de outubro a respecto do proxecto de urbanización da Zona D, expresou o total rexeitamento ao mesmo. Entre os argumentos expresados polo concelleiro nacionalista, destacaba o feito de que, en Monforte, existen múltiples bolsas de chan urbanizables baleiras, e vivendas en estado ruinoso.
Entenden que con esta decisión pódese producir unha “depreciación das propiedades e solares situados nos barrios máis afastados do centro, abocando ao seu definitivo abandono, e isto é algo realmente preocupante de cara a un completo e axeitado desenvolvemento urbano municipal”.
Ao longo dese mesmo debate, o alcalde sinalou que a urbanización da Zona D será sinónimo de “progreso” para Monforte, pero o BNG monfortino entende que “o proxecto implica a eliminación de hortas e zonas verdes situadas xunto ao río, para seren substituídas por rúas asfaltadas”, feito que para eles “non representa progreso ningún ao priorizar o cemento sobre o espazo verde, o vehículo sobre o peón”.
