O deputado monfortino, Francisco Conde, explica que, “coa supresión do paso a nivel e o peche metálico que está previsto instalar sobre un pequeno muro xa levantado nas inmediacións da estación, quedarán illadas as vivendas, propiedades e viñedos e imposibilitarase a comunicación entre ambas marxes da vía”.

O popular engade que “a única alternativa para poder chegar a esas vivendas é dar un gran rodeo por un camiño cunha escarpada pendente, na ladeira da montaña, e despois usar unhas escaleiras, o que se converte en inviable para persoas maiores e con mobilidade reducida”.

Por este motivo, os populares piden explicacións por este “trato discriminatorio”, toda vez que as obras nesta liña ferroviaria incluíron actuacións en plataformas, pasos inferiores e outras estruturas en estacións e apeadoiros. Conde comparte o sentir dos veciños e veciñas que “se senten marxinados e enganados” e lamenta que “tanto as súas queixas coma as do alcaldes sexan desoídas por ADIF de forma flagrante e inxusta”.

Conde sinala tamén que, ademais, son os propios veciños e veciñas os que advirten que o peche que está previsto instalar bloquea a única saída de evacuación dos residentes, habitantes, visitantes e usuarios do ferrocarril en caso de incendio ou inundación. De feito, este núcleo localízase en zona inundable por atoparse próximo -a uns 2 km- e nunha cota máis baixa que a presa de Santo Estevo do Sil. E a estrada da Deputación de Lugo LU-P-4103 (Santo Estevo do Sil – Ferreira de Pantón), que na actualidade presenta moi mal estado, atópase no seu primeiro tramo a unha cota máis baixa que a propia aldea.

Paso hablitado antes das obras / PP provincial