Os concelleiros do PP de Monforte defenderán no pleno que a corporación inste ao Goberno central á derrogación do Real Decreto 933/2021, do 26 de outubro, polo que se establecen as obrigacións de rexistro documental e información das persoas físicas ou xurídicas que exercen actividades de hospedaxe e alugueiro de vehículos de motor, procedendo urxentemente a establecer unha canle de interlocución fluído e construtivo cos nosos operadores hostaleiros, de axencias de viaxes e de alugueiro de vehículos afectados.
A voceira popular, Katy Varela, explica é preciso alcanzar unha solución consensuada e satisfactoria cos operadores afectados, ditar as normas precisas de desenvolvemento sobre as obrigas de rexistro documental e información das persoas físicas ou xurídicas que exercen actividades de hospedaxe e alugueiro de vehículos de motor. “Cómpre descartar calquera medida que poida danar a actividade turística e atentar contra a intimidade da seguridade de turistas e clientes”, afirmou.
Katy Varela recorda que tanto o Congreso como o Senado rexeitaron esta normativa, pero o Goberno de Pedro Sánchez ignorou por completo ambos pronunciamentos, descartando considerar un novo período de prórroga para a entrada en vigor desta “complexa e inasumible normativa, que lastra de cheo a operativa diaria de moitas pequenas empresas da cadea de valor turística, poñendo en risco con iso o funcionamento dos fluxos turísticos, á vez que xerando serios interrogantes de índole xurídica en materia de protección de dereitos e privacidade de turistas e usuarios, tanto de carácter doméstico como internacionais”.
