Asemblea Local do BNG de Monforte vén de elixir a Manuel Luaces como responsable local, xunto cun renovado Consello Local que combina experiencia e renovación. A dirección local queda conformada por: Candela López, Emilio Sánchez, Rosana Somoza, Alan Damián, Chelo Díaz, Xosé Lois Cortés, María Luísa López e Gabriel Díaz.

Na súa intervención, Luaces destacou o compromiso do grupo para fortalecer a organización en Monforte. Entre os obxectivos prioritarios para os vindeiros anos, sinalou o aumento da militancia, a dinamización do local mediante actividades abertas á cidadanía e a consolidación do BNG como unha forza política clave na cidade.

Así mesmo, fixo un chamamento á participación activa da militancia e á unidade do colectivo para continuar avanzando nun proxecto transformador para Monforte e para Galicia. “A nosa prioridade é sumar máis persoas a este proxecto e demostrar que o BNG é un espazo de portas abertas onde todas as sensibilidades teñen cabida. Queremos que a xente non só se achegue, senón que se sinta parte activa desta loita colectiva”, subliñou.

O responsable local tamén quixo recoñecer o traballo do Consello Local saínte e destacar a figura de Iván Merayo, “cuxo esforzo e dedicación son fundamentais para a organización a nivel local e comarcal”.