En marzo deste ano aprobábase, coa abstención do equipo de goberno, a moción presentada polo PSOE na que se pedía unha rebaixa no coeficiente aplicable en bens de rústica desde o 0,4% ó 0,3%; declarar a actividade agraria como de especial interese e se bonificar nun 95% os inmobles afectos; e o imposto a pensionistas. A moción tamén recollía unha campaña informativa e unha revisión de oficio do censo do Imposto de Bens Inmobles.

Para executar a moción era necesario modificar a ordenanza do IBI, pero o ano remata e a modificación segue sen facerse, polo que non se poderá aplicar no 2019. Para os socialistas a xestión que se fai desde INTA está sendo inxusta para a veciñanza, que soporta cos seus impostos a xestión económica do Concello e a súa despreocupación, dín, polos problemas da xente.

Agardan desde o PSOE que esta medida sexa tomada polo novo goberno que saia das eleccións de maio. Aseguran “En canto desaloxemos a Manuel Varela do goberno local, no noso primeiro pleno ordinario, aplicaremos estas medidas. Non perderemos un intre en desfacer os desastres de 8 anos de desgoberno”.