Nas alegaciós formuladas desde Por Chantada – Interior Galego Vivo, faise constar “o feito de ter anunciado desde a Deputación, na persoa de Pilar García Porto, unha serie de extremos que son totalmente falsos á luz do proxecto”, especifican:

• Anúncianse máis de 300.000 euros, mais unicamente figuran 282.000 euros no proxecto, que, dito sexa de pasaxe, é bastante menos do que levan decote Antas e Monforte e con aglomerado e non apenas grava.

• Fálase de quilómetros como se se fose arranxar entre eses pontos quilométricos, cando unicamente se vai actuar sobre anacos.

• Fálase de mellora do firme e arranxo cando na realidade unicamente se vai proceder a parcheo e uso de grava, que nen rego vai levar.

Aseguran que independientemente do anterior, “o estado das estradas do ente provincial no Concello de Chantada é absolutamente lamentábel e ten consecuencias para os vehículos e para aquelas persoas que resistimos nos lugares das parroquias rurais. Non se pode comprender como esta situación sexa crónica”.

Segundo Por Chantada desde que ostenta a presidencia José Tomé o investimento en aglomerado en quente da Deputación de Lugo en vías da súa titularidade no concello de Chantada foron 31.581 euros na mellora do firme da LU-P-1802 na parroquia de Sabadelle. “O recente arranxo entre Xedive e Andemil, na LU-P-1818, hai escasos meses xa ten fochancas. Fíxose tamén con grava e sen rego e xa é unha constante que non se supervise a durabilidade nen se apliquen garantías”.

Con todo, Por Chantada volve reiterar a súa demanda de que as estradas provinciais estean nun estado axeitado e formula alegaciós ao proxecto para que se cumpra a legalidade, modificándoo cunha maior dotación e retrotraendo o expediente para dar cumprimento ao solicitado a prol da veciñanza de Chantada.