Ao respecto deste proxecto, o PP asegura apostar firmemente pola protección do patrimonio, “comprendemos que a realidade do municipio aboca a pechar ao tráfico a ponte medieval máis pronto que tarde. Criticamos a falta dun estudio real sobre as repercusións que este peche terá para os residentes e os negocios da zona, que temen quedar sen comunicación directa”. Os populares consideran incomprensible que, en once anos de mandato, non se teñan realizado probas de corte de tráfico para avaliar o impacto real antes de comprometer un investimento “desta magnitude”.
Desde o Partido Popular piden sentido común e propoñen que se valoren outras opcións máis económicas, eficientes e xa proxectadas que responderían mellor ás necesidades da cidade, como dar prioridade á unión do barrio de Covas coa rúa Aceña Nova ou dar continuidade á circunvalación desde a estrada de Ourense ata a N-120, cumprindo os convenios pendentes co Ministerio de Fomento. Propoñen tamén solucións menos gravosas e máis sostibles como a ampliación da ponte nova ou a construción dunha estrutura máis sinxela dun só carril que dea servizo sen alterar de forma agresiva a contorna do Malecón.
Os populares aseguran que teñen como obxectivo un proxecto de futuro “que xere ilusión e emprego, non promesas millonarias sen cumprir. Defenderemos no pleno iniciativas con alternativas menos custosas para o Malecón, que actúen como revulsivo económico e palíen de xeito efectivo os problemas de tráfico derivados da necesaria peonalización da ponte medieval”. Convidan ao alcalde e ao seu equipo a reflexionar, xunto a todos os monfortinos, sobre se esta é realmente a solución máis conveniente para a cidade.
