A Central Sindical Independente e de Funcionarios (CSIF) solicitou ao Concello de Monforte a apertura inmediata dun proceso de negociación colectiva para implantar a xornada laboral de 35 horas semanais. Lembra que a normativa vixente obriga ás entidades locais a equiparar a xornada laboral do seu persoal coa fixada para a Administración do Estado. “Neste sentido, tanto a Lei Reguladora das Bases do Réxime Local como a Lei de Emprego Público de Galicia establecen que a xornada dos funcionarios locais debe ser, en cómputo anual, a mesma que a dos funcionarios estatais”, explica.

O sindicato sostén que esta equiparación ten carácter obrigatorio e dinámico, polo que a implantación da xornada de 35 horas na AGE debe trasladarse tamén ao ámbito local, sen prexuízo da súa concreción a través da negociación colectiva.

Así mesmo, CSIF subliña que manter condicións laborais distintas entre empregados públicos de diferentes administracións vulneraría o principio de igualdade e podería xerar disfuncións organizativas. Con todo, a organización sindical solicita o inicio inmediato da negociación na Mesa Xeral e a implantación efectiva da xornada de 35 horas, ademais da adaptación do calendario laboral e do réxime horario a este novo marco.

Advirte o sindicato de que, en caso de inacción por parte do Concello, resérvase o dereito para emprender as accións legais oportunas, incluída a vía contencioso-administrativa.