Na súa exposición de motivos, Por Chantada-CUP, asegura que na actualidade, a apicultura é unha actividade social e economicamente relevante en Galicia, con máis de 160.000 colmeas en 4.000 explotacións diferentes. Consideran que se trata dun sector cun grande potencial na comarca, pero con moitas problemáticas por “carecer dunha intervención eficiente por parte da Administración”.
Lembran que desde a década dos oitenta son precisos custosos tratamentos para combater o ácaro da varroa (Varroa destructor), ao que se engade a invasión da Vespa velutina e a falta dunha defensa eficaz. Outro problema, segundo Por Chantada-CUP, está na produción e comercialización. “Fudamentalmente desde Arxentina e China entra mel de baixa calidade ou, moitas veces, adulterado, permitindo a normativa etiquetar meles con menos 1% de mel procedente da Unión Europea como mistura de meles orixinarios e non orixinarios da UE, o que, o que supón unha estafa ao consumidor e un fraude a un sector que, na Galiza, desenvolve un papel imprescindíbel.”
A Asociación Galega de Apicultura (AGA) e o Sindicato Labrego Galego (SLG) co lema “En defensa do noso mel, por un sector apícola rendíbel e sustentábel” concentrábanse recentemente en Compostela reclamando solucións ás administracións públicas para unha etiquetaxe clara.
A todo o anterior, engaden desde Por Chantada-CUP, os beneficios do consumo de mel para a saúde, para a economía e para o medio natural; con todo, solicitan ao concello instar á Xunta e ao Goberno central a desenvolver unha lexislación e unha etiquetaxe para que as persoas consumidoras teñan garantías da procedencia do mel que consumen e instar á Xunta a promover campañas para divulgar e informar sobre os beneficios do consumo de mel galego e o selo Mel da Galiza.
