A iniciativa contempla que o Concello de Monforte inicie negociacións coa propiedade do inmoble para coñecer as condicións dunha posible adquisición pública e que, posteriormente, se establezan vías de colaboración coa Xunta, a través do Instituto Galego da Vivenda e Solo (IGVS), e coa Administración do Estado para facer viable a súa rehabilitación e posta en uso como parque público de vivenda.
Segundo explica o voceiro nacionalista, Manuel Luaces, “o problema da vivenda non se vai resolver deixando todo nas mans do mercado. As administracións públicas teñen a responsabilidade de actuar e de poñer recursos ao servizo da cidadanía para garantir un dereito básico”.
Luaces destaca que o antigo Sanatorio Raíces reúne unhas condicións excepcionais para este fin. “Falamos dun edificio situado nunha localización inmellorable, próximo a servizos, centros educativos e sanitarios, cunha estrutura en bo estado e cunha capacidade estimada para arredor de vinte vivendas. É unha oportunidade que Monforte non pode deixar pasar”.
O concelleiro do BNG considera que apostar pola rehabilitación deste inmoble permitiría reducir custos e prazos respecto dunha promoción de nova construción, ao tempo que se recupera un edificio emblemático da cidade. “Estamos diante dun exemplo claro de como se pode dar resposta a unha necesidade social urxente e, ao mesmo tempo, preservar e reutilizar patrimonio xa existente, apostando por un modelo de desenvolvemento máis sostible”.
Desde o BNG sinalan que a colaboración entre administracións será fundamental para facer realidade este proxecto. “Hai programas de financiamento e rehabilitación tanto da Xunta como do Estado que poden converter esta proposta nun proxecto viable e beneficioso para Monforte”, afirma Luaces.
“A vivenda pública é unha ferramenta imprescindible para fixar poboación, facilitar a emancipación da mocidade e garantir que quen queira vivir en Monforte poida facelo. É o momento de actuar con ambición e aproveitar oportunidades como a que representa o Sanatorio Raíces”, conclúe Luaces.
