Desde o BNG consideran que o inmoble reúne unhas condicións excepcionais, tanto polo seu estado estrutural como pola súa localización e polo prezo ao que os propietarios están dispostos a vendelo, “Trátase dunha oportunidade única para poñer en marcha un proxecto que permitiría crear arredor de vinte vivendas públicas cun investimento moi inferior ao que suporía unha construción nova”.

A pesar do voto en contra do equipo de goberno, o BNG non renuncia a este proxecto. Pola contra, aseguran que intensificarán o traballo para buscar outras vías e outras administracións que poidan facer posible a adquisición do edificio e a súa rehabilitación para destinalo a vivenda pública. “Cremos que o acceso á vivenda é un dos principais retos que ten hoxe Monforte. A dificultade da mocidade para emanciparse e a escaseza de oferta accesible esixen que as administracións actúen con ambición e aproveiten oportunidades como esta cando aparecen”, insisten.

O BNG asegura defender un modelo no que a vivenda pública sexa unha ferramenta útil para garantir o dereito a unha vivenda digna e ofrecer alternativas reais ás persoas que hoxe teñen serias dificultades para acceder a un fogar. “Non imos abandonar unha iniciativa que consideramos estratéxica para o futuro de Monforte e seguiremos traballando para que o edificio Raíces poida cumprir unha función social ao servizo da veciñanza”, conclúen.