Dende o Grupo Provincial Popular esíxese a anulación inmediata deste acordo “debido ao enorme clamor e rexeitamento social que xera o proxecto na cidade, así como pola situación do alcalde monfortino, José Tomé, actualmente investigado por un presunto delito de acoso sexual e que precisa dos fondos para pagar a súa campaña política para as eleccións municipais”.
Antonio Ameijide afirmou que dende o Grupo Popular levarán esta moción a pleno “para garantir que os recursos públicos de tódolos lucenses non vaian a parar, en concreto, para o proxecto da nova ponte do Malecón que ten unha forte contestación social en Monforte”. Neste senso, Ameijide destacou que existe un clamor social en Monforte contra esta obra e, “por suposto, o que non se pode facer, de ningunha maneira, é pagar cos cartos de todos os lucenses a campaña política de José Tomé”.
O voceiro popular tamén se referiu á posición do BNG, “Mentres o BNG en Monforte di poñerse en contra da obra, dende a Deputación de Lugo aproban o convenio e envían o diñeiro para este fin.”
Pola súa banda, Katy Varela anunciaba que que presentarán tamén moción ao pleno de Monforte, “xa que Tomé non está lexitimado para comprometer 2,8M€ do orzamento municipal para os vindeiros anos a tan só 10 meses para as eleccións”. A voceira popular lembra que “o BNG se escuda nunha mera autorización técnica da Dirección Xeral de Patrimonio que nada ten que ver coa vontade política de executar a obra”.
“Mentres o PSOE e o BNG pactan nos despachos para impoñer unha obra que os monfortinos non queren, o PP de Monforte mantense firme ao lado da reclamación popular”, destaca Varela.
