A través das redes sociais o concello informa de que a situación agravouse recentemente, tras a baixa da única facultativa restante, que coincide ademais co aumento de poboación estival e, por tanto, cun incremento na demanda. “A súa baixa estase a cubrir con días soltos e sen unha previsión real, resultando en que hai días nos que a veciñanza da Pobra do Brollón está desprovista totalmente de atención médica”, aseguran.
Así, a día de hoxe, non hai consultas médicas dispoñibles ata dentro de nove días, e ademais nun horario limitado a aproximadamente unha hora cada día. A esta demora en acceder a unha consulta hai que sumar o inconveniente dunha falta de atención continuada e estable, especialmente importante para persoas con enfermidades crónicas. “Tendo en conta a avanzada idade media da poboación da Pobra do Brollón, a situación faise especialmente preocupante”, sinala o alcalde, Xosé Lois Maceda.
Dende o goberno municipal tamén se denuncia a ausencia de pediatra no Centro de Saúde local, que tan só atende un día á semana, e actualmente ningún xa que está de baixa sen cubrir. “Ambas situacións implican a deriva aos servizos de saúde de Quiroga ou de Monforte, xa de por si saturados, e coas dificultades que isto supón para a poboación, especialmente para os máis maiores”, engade Maceda.
Esixen desde o concello que, como mínimo, se ocupe de xeito definitivo a praza do médico xubilado e se cubran as baixas do médico de familia e do pediatra con maior rapidez e continuidade no tempo. “Son uns mínimos para que a veciñanza da Pobra do Brollón poida recibir a atención sanitaria digna e de calidade á que teñen dereito todos os cidadáns e cidadás”, asegura o alcalde.
O PP local acusa ao alcalde de crear “alarmismo innecesario”
O voceiro popular, Teddy López, cualifica de “inaceptable e sectaria” a actitude do rexedor que, “lonxe de colaborar na procura de solucións, prefiriu lanzar unha campaña de descrédito e presión inaceptable sobre os profesionais da saúde”.
Afirma que ante a baixa laboral da titular do consultorio, procedeuse de inmediato a designar un médico substituto, “No seu primeiro día, o facultativo asignado non puido acudir ao centro de saúde debido a unha cita médica propia, un dereito fundamental e incuestionable que asiste a calquera traballador, incluídos os profesionais sanitarios”. Posteriormente o médico incorporouse, “e durante todo o mes de agosto esa praza estará cuberta e os veciños da Pobra do Brollón disporemos sempre de médico no centro de saúde”.
Teddy López esixe ao alcalde que abandone a mentira e a demagoxia. “A Pobra do Brollón non pode permitirse un alcalde que semente alarmismo entre os veciños inventando crises asistenciais onde non as hai e poñendo en risco a atracción e estabilidade de profesionais médicos no rural”, denunciou. E engade, “o Goberno de España non dá solucións ao déficit de profesionais en determinadas especialidades como medicina familiar e comunitaria”.
