O proxecto presentárase no 2022 como unha importante aposta industrial para Monforte, cun importante investimento e a previsión de crear arredor dun cento de postos de traballo. O BNG lembra que a empresa solicitou a comezos deste ano unha nova prórroga para iniciar as obras, polo que considera necesario explicar publicamente en que situación se atopa actualmente a iniciativa.

O concelleiro do BNG, Emilio J. Sánchez, lamenta que “todo apunta a que podemos estar diante doutra promesa incumprida para Monforte. Durante anos vendeuse este proxecto como unha das grandes oportunidades industriais para a cidade e, a día de hoxe, seguimos sen ver a fábrica nin os postos de traballo anunciados”.

Sánchez considera que “sería unha pésima noticia que finalmente Kern Pharma non desenvolvese este proxecto en Monforte, porque a nosa cidade e toda a comarca necesitan emprego estable, industria e oportunidades que permitan fixar poboación”.

Desde o BNG sinalan que non se trata de buscar culpables antes de coñecer todos os datos, senón de esixir explicacións e certezas despois de anos de anuncios e sucesivos atrasos. O BNG reclamará información sobre a situación administrativa do proxecto e sobre os contactos mantidos coa empresa para coñecer se Kern Pharma mantén o seu compromiso de instalar a planta no Reboredo.

“Agardamos que o proxecto aínda poida saír adiante, porque sería positivo para Monforte. Pero despois de máis de catro anos é lóxico que exista preocupación. O que non queremos é que unha iniciativa anunciada a bombo e prato remate converténdose noutra promesa incumprida”, conclúe Sánchez.