A formación política considera que tanto a Deputación Provincial como o Concello minten con respecto ao proxecto da residencia para Folgoso do Courel. A institución provincial “porque se se comprometeu, tivo tempo e financiamento para levar a cabo o proxecto, mentres desde a alcaldía non contan toda a verdade sobre a residencia nin solicitaron nunca de maneira formal a súa construción á Xunta de Galicia, que é quen ten as competencias sociais para facela, e así o fan noutros concellos”.

Segundo Caurel Vivo durante 19 anos a residencia foi “pasando de man en man”, Concello, Xunta, Deputación… “Houbo proxecto, cartos e prórrogas, pero por diferenzas políticas, non se fixo nada”. Denuncian que a realidade a día de hoxe é que non hai ningún convenio asinado e ningún expediente aberto para a construción da residencia. E esixen á Xunta que tome medidas por ser quen ten competencias ao respecto, “A Xunta non semella ter ningún interés na súa construción, incluso en outubro de 2018 emitiu un informe desfavorable ao respecto”.

Lembran desde Courel Vivo que desde o 2015 reclaman este proxecto para o concello e piden actuacións concretas e non promesas, “Levamos varias mocións e preguntamos en cada pleno polos avances. Nas respostas sempre nos dan largas mentres seguen pasando os anos, Canto máis tempo nos ides seguir enganando?”