As dúas formacións políticas manifestan a súa preocupación polo proxecto da nova senda peonil prevista á beira dos regatos de Monforte, unha actuación que se executará ao abeiro dun convenio coa Confederación Hidrográfica Miño-Sil (CHMS).
O PP de Monforte considera fundamental corrixir agora os posibles erros “para evitar que no futuro se reproduzan situacións como as vividas noutras actuacións urbanísticas en Monforte, como a Zona C ou o Parque do Hospital, “que derivaron en procesos xudiciais con importantes consecuencias económicas para as arcas municipais”
Tras revisar a documentación, os concelleiros populares contabilizaron ata 68 propiedades afectadas, nas que figuran construcións de distinta natureza, entre elas cando menos tres inmobles de uso residencial. En reunión coa veciñanza aseguran que lles trasladaron a preocupación polo derrubamento das súas vivendas. Anímana a consultar o proxecto, “especialmente o Tomo V, no que se detallan as parcelas incluídas na actuación e presentar alegacións se o consideran”.
Con todo os populares rexistraron unha batería de preguntas dirixidas ao alcalde de Monforte para aclarar as condicións dos convenios asinados coa CHMS para a execución destas obras, “as informacións que apuntan a que, unha vez rematadas as actuacións, o Concello podería verse obrigado a aboar anualmente unha taxa á CHMS polo mantemento ou utilización destas infraestruturas”.
Pídenlle a Tomé transparencia sobre as obrigas que terá o Concello e reclámanlle diálogo cos veciños afectados, “que lles facilite toda a información e actúe con responsabilidade para evitar conflitos xudiciais e novos custos que acaben recaendo sobre todos os monfortinos.”
Pola súa banda Esperta Monforte lembra que votou en contra do proxecto, “non por estar en contra de sendas peonís ou recuperación de regatos, senón polas incógnitas que presentaba”. Aseguran que xa advertiran das expropiacións previstas, na rúa Doutor Fleming, así como do elevado custo nalgunhas infraestruturas.
Esperta Monforte reclama que se estuden alternativas para reducir as afeccións aos propietarios antes de continuar coa tramitación das expropiacións
