Os afiliados do PP de Monforte de Lemos mantiveron esta semana unha reunión de traballo centrada na preparación das eleccións xerais que se celebrarán o vindeiro 29 de novembro. A presidenta e portavoz municipal, Katy Varela, cre que “é fundamental para os intereses do país cambiar o equipo de Goberno en España”. Nese sentido, defende a Alberto Núñez Feijóo como alternativa: “Feijóo traballará para mellorar a vida dos españois e, polo tanto, iso vai influír positivamente tamén para todos os monfortinos”.
A popular lembra en que “hai moitos proxectos do Goberno central pendentes en Monforte”. Ao vindeiro pleno os populares presentan o proxecto para rematar a rolda urbana que iría desde a estrada de Ourense ata a N-120, “O convenio asinado co Concello de Monforte no ano 2023 aínda non se comezou a executar”. Mención tamén ao soterramento dos pasos a nivel en Xiamontes e Río Seco, “as obras están paralizas ocasionando trastornos aos veciños. Tamén é necesario mellorar o transporte por ferrocarril”. Así, considera que “será moi positivo” cambiar o Goberno nacional presidido por Sánchez.
Varela puxo en valor que o monfortino, Francisco Conde, volva encabezar a candidatura do Partido Popular ao Congreso pola provincia de Lugo e explicou que “nesta ocasión non puido asistir porque tiña outros compromisos tamén relacionados coa precampaña, pero contaremos coa súa participación en vindeiras reunións de traballo”.
A xestión da auga e o estado do campo de fútbol da Pinguela
O PP interésarase no vindeiro pleno pola tramitación do novo contrato de xestión do abastecemento e saneamento da auga e o estado no que se atopa o campo de fútbol da Pinguela.
Solicitarase información sobre en que punto se atopa o procedemento para a contratación do servizo de abastecemento e saneamento da auga, unha cuestión sobre a que consideran necesario que o goberno local ofreza explicacións claras e actualizadas.
E queren coñecer que medidas ten previsto adoptar o Concello ante o mal estado do campo de fútbol da Pinguela e para garantir que se atope nas condicións adecuadas para a práctica do fútbol. Defenden a importancia de que o goberno local dea conta da súa xestión, informe dos procedementos en marcha e concrete as actuacións que pensa desenvolver, de maneira que a cidadanía poida coñecer a situación real destes asuntos e as solucións previstas.
Campo de fútbol da Pinguela / PP de Monforte
