IniciosociedadeA primeira churrasquería da provincia de Lugo está en Cereixa, na Pobra...

A primeira churrasquería da provincia de Lugo está en Cereixa, na Pobra do Brollón

Publicado o

- Advertisement -

Antonio Méndez, un veciño de Cereixa, A Pobra do Brollón, alá polos anos 60 como moitos da súa época tivo que meter as poucas pertenzas que tiña e cruzar o Atlántico en busca dun futuro.

Tras anos de traballo nun banco en Caracas (Venezuela), a principios dos 70 decidiu que era hora de voltar á terra para, xunto coa súa dona, investir os cartos aforrados e así gañarse a vida na casa. Se ben é certo que dende o primeiro momento sabía que quería montar un negocio, ó principio tiveron dúbidas de se crear un ultramarinos ou unha parrillada, o que hoxe se coñece como unha churrasquería.

Deste xeito, Antonio e Isaura, a súa dona, adentráronse no mundo da carne á grella, os chourizos criollos e as molexas de tenreira á brasa. Foi na pequena aldea de Cereixa, onde hai 45 anos abriu a primeira churrasquería da provincia de Lugo. Concretamente, o 6 de xaneiro de 1973 a parrillada O Fogón abriu as súas portas por primeira vez.

Marcos Méndez, o fillo do matrimonio, sinala que os seus pais abriron unha parrillada porque “en Caracas había moitos rodicios e restaurantes de carnes á grella, e tendo en conta que o prato estrela en Galicia é a carne, pensaron que sería a combinación perfecta”.

Os primeiros anos de andaina non foron doados debido a que tiñan que traballar arreo para dar de comer ós centos de persoas que acudían diariamente ás súas instalacións, coñecedores da boa carne e da súa excelente preparación. Tal foi o éxito que non tardaron en celebrarse bautizos, comunións e vodas tanto dos veciños da zona como dos de lonxe. O boca a boca fixo o resto, tanto como para que ata Cereixa chegasen grupos de todas partes de Galicia para degustar os manxares feitos por Antonio e Isaura.

Debido ó seu éxito, polos anos 80 tiveron que ampliar as instalacións pois non era posible dar cabida a todos os que por alí pasaban. Antonio, que naquel intre xa tiña uns aforros feitos co negocio, decidiu ampliar. Tal foi a magnitude da reforma, que na actualidade segue vixente.

Troitas, tortillas, postes caseiros e, por suposto, churrasco, para ser degustado en táboas de madeira, foron o buque insignia dende aquel momento. Pero tan famosa era a comida como as salsas. Marcos, conta que “as salsas do Fogón saíron da cociña a través da proba e erro. Tanto a salsa verde como a vermella foron cousas do meu pai. Cando abriron tiñan un cliente ó que lle encantaba o picante. A raíz de diso, comezou a experimentar con ingredientes ata que conseguiu facer as tan veneradas salsas. É máis, é a receita secreta da casa. Ninguén que non pertenza ó local sabe a súa composición”.

Ya polo ano 1995, Antonio e Isaura decidiron que era época de xubilarse e dar paso a novas xeracións. Deste xeito, o seu fillo Marcos colleu o timón daquel grandioso barco. Sempre cos pais na sombra e axudándoo en todo o que necesitaba, seguiu coa tradición familiar. Ó igual que o seu pai, a preferencia sempre foron os veciños. Tanto, que todos os empregados que por alí pasaron eran rapaces e rapazas do concello, sobre todo no verán, que era cando máis traballo había.

Xa polo 2008 o negocio deixou de ser rexentado pola familia para estar alugado. Pero o 20 de xullo do 2018 non é un día calquera no Fogón. É a data en que, Víctor,  un rapaz novo de Cereixa, armado de valor e confiado nos valores cos que Antonio e Isaura abriron por primeira vez o local, ponse ó mando da churrasquería para dar de comer a todo o que entre pola porta.

 

 

 

ÚLTIMAS

Afra Blanco: “A Feira do Viño de Quiroga é a primeira festa que descubrín de Galicia”

Afra Blanco, que fora portavoz da sección xuvenil da UGT e hoxe responsable de...

Sinistro de circulación en Chantada

Segundo informou o 112, o persoal do Servizo de Urxencias Sanitarias de Galicia-061 foi...

A Deputación esixe á Xunta o remate urxente da estrada de Folgoso do Courel derrubada hai dous anos

A Deputación de Lugo esixe á Xunta de Galicia medidas urxentes para axilizar e...

O Club Quixós participa estes días na 2ª Copa de España de Eslálom Olímpico

O Club de Piragüismo Quixós, de Monforte, chegou con dez deportistas a terras catalás...