A sección segunda da Audiencia Provincial de Lugo condenou ao administrador dunha empresa de construcións de Sarria a dous anos e medio de prisión por un delito contra a Seguridade Social.

Segundo o tribunal, a compañía contraeu unha débeda de 134.353 euros entre os anos 2014 e 2018 ao non “pagar as cotas a que viña obrigada por Seguridade Social, patronal e obreira”, algo do que acusa o condenado, que actuou “de forma consciente e coa intención deliberada de defraudar á Seguridade Social”.

Ademais da pena de prisión, os maxistrados tamén lle impoñen unha multa de 268.707 euros e deberá indemnizar á Tesouraría Xeral da Seguridade Social.

Por outra banda, o tribunal absolve á outra administradora da empresa ao considerar que “non realizou actos típicos nin tampouco de participación no feito alleo. Só tivo participacións da entidade mercantil”. Contra a sentenza cabe presentar recurso.