O obxectivo da iniciativa é reforzar o control do cumprimento das normas durante o proceso da colleita de uva, coordinándose cos técnicos dos Consellos Reguladores para reforzar o seu labor. Trátase, segundo explicou, de verificar que todo se fai conforme á normativa de cada consello regulador.

O plan contempla o despregue por parte da Consellería dunha vintena de técnicos que se repartirán polas distintas denominacións de orixe para controlar cuestións como a entrada de uva nas adegas, a súa procedencia ou que o froito sexa de viticultores e de parcelas inscritos nos rexistros dos consellos reguladores.

Segundo o Conselleiro aplícase o máximo rigor para evitar situacións fraudulentas que se poidan producir, na procura da Galicia calidade.  Neste sentido, o conselleiro afirmou que neste eido “a nosa comunidade aposta por ser competitiva en calidade e en darlle valor engadido aos nosos produtos”. A medida supón un investimento de 180.000 euros.

O sector aglutina máis de 13.000 viticultores, máis de 450 adegas e achega un valor económico que supera os 200 millóns de euros ao ano. É ademais o eido agrario máis exportador de Galicia.